ಕಳೆದ ವರ್ಷ ಸ್ಯಾಂಡಲ್‌ವುಡ್‌ನ ‘ಕಾಂತಾರ’ ಸೇರಿದಂತೆ ಹಲವು ಸಿನಿಮಾಗಳು ಸೂಪರ್‌ಹಿಟ್‌ ಆಗಿ, ಇಡೀ ಭಾರತೀಯ ಚಿತ್ರರಂಗ ಕನ್ನಡದತ್ತ ಬೆರಗುಗಣ್ಣಿನಿಂದ ನೋಡಲು ಆರಂಭಿಸಿತು. ಆದರೆ ಇದೇ ಹುಮ್ಮಸ್ಸಿನಲ್ಲಿ 2023ನೇ ವರ್ಷ ಆರಂಭಿಸಿದ ಸಿನಿಮಾ ಮಂದಿಗೆ ಇಲ್ಲಿಯವರೆಗೂ ಯಶಸ್ಸು ಸಿಗಲಿಲ್ಲ. ಈ ವರ್ಷದ ಆರಂಭದಿಂದ ಯಾವ ಸಿನಿಮಾವೂ ಚಿತ್ರಮಂದಿರದಲ್ಲಿ ಸದ್ದು ಮಾಡಲಿಲ್ಲ.
ಆದರೆ ಕಳೆದ ಎರಡು ವಾರಗಳಲ್ಲಿ ಈ ಚಿತ್ರಣ ಬದಲಾಗಿದೆ. ಕನ್ನಡ ಸಿನಿಮಾಗೆ ಮತ್ತೆ ಜನರು ಬರಲಾರಂಭಿಸಿದ್ದಾರೆ. ವಿಜಯಲಕ್ಷ್ಮಿ ಸ್ಯಾಂಡಲ್‌ವುಡ್‌ನ ಬಾಕ್ಸ್‌ಆಫೀಸ್‌ಗೆ ನಿಧಾನವಾಗಿ ಹೆಜ್ಜೆ ಹಾಕುತ್ತಿದ್ದಾಳೆ.
ಕಳೆದ ವಾರ ಬಿಡುಗಡೆಯಾದ ‘ಹಾಸ್ಟೆಲ್‌ ಹುಡುಗರು ಬೇಕಾಗಿದ್ದಾರೆ’ ಸಿನಿಮಾ ಆರು ತಿಂಗಳಿನಿಂದ ಬರ ಹಿಡಿದಿದ್ದ ಸ್ಯಾಂಡಲ್‌ವುಡ್‌ನ ಬಾಕ್ಸ್‌ ಆಫೀಸ್‌ಗೆ ಜೀವ ನೀಡಿತು. ಯಾವುದೇ ಸ್ಟಾರ್‌ ಇಲ್ಲದೆ, ಅನುಭವಿ ನಿರ್ದೇಶಕರೂ ಇಲ್ಲದೆ ಈ ಸಿನಿಮಾ ಸೂಪರ್‌ಹಿಟ್‌ ಆಯಿತು. ಇದಕ್ಕೆ ಕಾರಣ ಅವರು ಆರಂಭದಿಂದಲೂ ಮಾಡಿದ ವಿಭಿನ್ನ ರೀತಿಯ ಪ್ರಚಾರ ಒಂದು ಕಡೆಯಾದರೆ, ಚಿತ್ರದಲ್ಲಿದ್ದ ಕಂಟೆಂಟ್‌ ಮತ್ತೊಂದು ಕಾರಣ. ಸಿನಿಮಾದ ಮೊದಲ ದೃಶ್ಯದಿಂದ ಕೊನೆಯ ದೃಶ್ಯದವರೆಗೂ ಜನರನ್ನು ನಗಿಸುವ ಅವರ ಅವರ ಐಡಿಯಾ ಫಲಿಸಿತು. ಹಾಗಾಗಿ ಈ ಸಿನಿಮಾ ಸೂಪರ್‌ಹಿಟ್‌ ಚಿತ್ರಗಳ ಸಾಲಿಗೆ ಸೇರಿತು.
ಶಶಾಂಕ್‌ ನಿರ್ದೇಶನದ ‘ಕೌಸಲ್ಯಾ ಸುಪ್ರಜಾ ರಾಮ’ ಸಿನಿಮಾ ಕೂಡ ಉತ್ತಮ ಕಲೆಕ್ಷನ್‌ ಮಾಡುತ್ತಿದೆ. ಈ ಸಿನಿಮಾದ ಕಂಟೆಂಟ್‌ ಕುಟುಂಬ ಸಮೇತ ನೋಡುವಂತಹದ್ದು. ‘ಹಾಸ್ಟೆಲ್‌ ಹುಡುಗರು ಬೇಕಾಗಿದ್ದಾರೆ’ ಸಿನಿಮಾ ಯುವ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಕರೆತಂದರೆ, ‘ಕೌಸಲ್ಯಾ ಸುಪ್ರಜಾ ರಾಮ’ ಚಿತ್ರ ನೋಡಲು ಇಡೀ ಕುಟುಂಬ ಸಮೇತ ಜನರು ಬರುತ್ತಿದ್ದಾರೆ. ಇದರ ಜತೆಗೆ ಬಿಡುಗಡೆಯಾಗಿರುವ ಮತ್ತೊಂದು ಚಿತ್ರವೂ ಉತ್ತಮ ಕಲೆಕ್ಷನ್‌ ಮಾಡುತ್ತಿದೆ. ‘ನಮ್ಮದು ಫ್ಯಾಮಿಲಿ ಆಡಿಯನ್ಸ್‌ಗೆ ಕನೆಕ್ಟ್ ಆಗುವಂತಹ ಸಿನಿಮಾ. ಹಾಗಾಗಿ ಶನಿವಾರ ಮತ್ತು ಭಾನುವಾರ ಉತ್ತಮ ಬುಕ್ಕಿಂಗ್ಸ್‌ ಆಗುತ್ತಿದೆ. ಒಳ್ಳೆಯ ಕಂಟೆಂಟ್‌ ಮತ್ತು ಉತ್ತಮ ಸಿನಿಮಾ ನೀಡಿದರೆ ಜನರು ಖಂಡಿತಾ ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡುತ್ತಾರೆ. ಸೋಮವಾರವೂ ಉತ್ತಮ ಕಲೆಕ್ಷನ್‌ ಆಗುವ ಲಕ್ಷಣ ಗೋಚರಿಸುತ್ತಿದೆ. ಹಾಗಾಗಿ ನಮ್ಮ ಸಿನಿಮಾ ಈ ವರ್ಷದ ಸೂಪರ್‌ಹಿಟ್‌ ಸಿನಿಮಾಗಳಲ್ಲಿಒಂದಾಗುತ್ತದೆ’ ಎಂದು ನಿರ್ದೇಶಕ ಶಶಾಂಕ್‌ ಹೇಳಿದ್ದಾರೆ.
ಆಗಸ್ಟ್‌ನಲ್ಲಿ ರಾಜ್‌ ಬಿ ಶೆಟ್ಟಿಯ ‘ಟೋಬಿ’ ಸೇರಿದಂತೆ ಮತ್ತೊಂದಿಷ್ಟು ನಿರೀಕ್ಷೆಯ ಸಿನಿಮಾಗಳಿದ್ದು, ಇವುಗಳ ಮೂಲಕ ಈ ಸಕ್ಸಸ್‌ ಟ್ರೆಂಡ್‌ ಇನ್ನಷ್ಟು ದಿನಗಳ ಕಾಲ ಮುಂದುವರೆಯುತ್ತದೆ ಎಂದು ಕಾದುನೋಡಬೇಕಿದೆ.
