ಏಷ್ಯಾ ಕಪ್ 2023 ಟೂರ್ನಿಯಲ್ಲಿ ಪಾಕಿಸ್ತಾನ ವಿರುದ್ಧದ ಸೂಪರ್-4 ಘಟ್ಟದ ಹೈ-ವೋಲ್ಟೇಜ್ ಹಣಾಹಣಿಗೆ ಶ್ರೇಯಸ್‌ ಅಯ್ಯರ್ ಫಿಟ್ನೆಸ್‌ ಸಮಸ್ಯೆ ಕಾರಣ ಅಲಭ್ಯರಾದ ಕುರಿತಾಗಿ ಮಾಜಿ ಕ್ರಿಕೆಟಿಗ ಸಂಜಯ್ ಮಾಂಜ್ರೇಕರ್‌ ಅಸಮಾಧಾನ ಹೊರಹಾಕಿದ್ದಾರೆ. ಇಲ್ಲಿನ ಆರ್‌ ಪ್ರೇಮದಾಸ ಕ್ರೀಡಾಂಗಣದಲ್ಲಿ ಭಾನುವಾರ (ಸೆಪ್ಟೆಂಬರ್‌ 10) ನಡೆದ ಪಂದ್ಯದಲ್ಲಿ ಭಾರತ ತಂಡ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಬೇಕಾಯಿತು. ಟಾಸ್‌ ವೇಳೆ ಮಾತನಾಡಿದ ನಾಯಕ ರೋಹಿತ್‌ ಶರ್ಮಾ, ಬೆನ್ನು ನೋವಿನ ಕಾರಣ ಶ್ರೇಯಸ್‌ ಅಯ್ಯರ್ ಅಲಭ್ಯರಾಗಿದ್ದಾರೆ.
ಶ್ರೇಯಸ್‌ ಅಯ್ಯರ್ ಫಿಟ್ನೆಸ್‌ ಬಗ್ಗೆ ನನಗೆ ಕುತೂಹಲ ಮೂಡುತ್ತಿದೆ. ದೀರ್ಘ ಸಮಯದ ವಿಶ್ರಾಂತಿ ಬಳಿಕ ಅವರು ಭಾರತ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡಿದ್ದಾರೆ. ಶ್ರೇಯಸ್‌ ಸಂಪೂರ್ಣ ಫಿಟ್‌ ಆಗಿದ್ದಾರೆ. ಇದೇ ಕಾರಣಕ್ಕೆ ಗ್ರೂಪ್ ಹಂತದ ಮೊದಲ ಎರಡೂ ಪಂದ್ಯಗಳಲ್ಲಿ ಅವರು ಆಡಿದ್ದರು. ಪಾಕಿಸ್ತಾನ ಎದುರು ಗ್ರೂಪ್ ಪಂದ್ಯದಲ್ಲಿ ಉತ್ತಮವಾಗಿ ಬ್ಯಾಟ್‌ ಮಾಡಿದ್ದರು ಕೂಡ. ಈಗ ಮತ್ತೆ ಬೆನ್ನು ನೋವಿನ ಕಾರಣ ಹೊರಗುಳಿದಿದ್ದಾರೆ. ದುರದೃಷ್ಟಕರ ಭಾರತ ತಂಡ ಅನಿವಾರ್ಯ ಬದಲಾವಣೆ ತಂದುಕೊಳ್ಳುವಂತ್ತಾಗಿದೆ,” ಎಂದು ಸಂಜಯ್ ಅಸಮಾಧಾನ ಹೊರಹಾಕಿದ್ದಾರೆ.
