ಕರ್ನಾಟಕ ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್ ಭಾರೀ ಅಂತರದ ಜಯ ದಾಖಲಿಸಿರುವುದರಿಂದ, ಪಕ್ಷವೀಗ ಮೂರು ರಾಜ್ಯಸಭಾ ಸ್ಥಾನಗಳನ್ನು ಅನಾಯಾಸವಾಗಿ ತನ್ನಲ್ಲೇ ಉಳಿಸಿಕೊಳ್ಳಲಿದೆ. ಮುಂದಿನ ವರ್ಷ ರಾಜ್ಯದ ನಾಲ್ವರು ಮೇಲ್ಮನೆ ಸದಸ್ಯರು ನಿವೃತ್ತಿಯಾಗಲಿದ್ದು, ಕಾಂಗ್ರೆಸ್ ತನ್ನ ಮೂರು ರಾಜ್ಯಸಭಾ ಸ್ಥಾನಗಳನ್ನೂ ಉಳಿಸಿಕೊಳ್ಳಲಿದೆ. ಇದೇ ವೇಳೆ ಮುಂದಿನ ಮೂರು ವರ್ಷಗಳಲ್ಲಿ ರಾಜ್ಯಸಭೆಯಲ್ಲಿ ಪಕ್ಷದ ಬಲ ಐದರಿಂದ ಏಳಕ್ಕೆ ಏರಿಕೆಯಾಗಲಿದೆ. ಮತ್ತೊಂದೆಡೆ, ಹೆಚ್.ಡಿ. ದೇವೇಗೌಡರ ಅಧಿಕಾರಾವಧಿ 2026ರ ಮಧ್ಯದಲ್ಲಿ ಅಂತ್ಯವಾಗಲಿದ್ದು, ಪಕ್ಷ ಇರುವ ಒಂದು ಸ್ಥಾನವನ್ನೂ ಕಳೆದುಕೊಳ್ಳಲಿದೆ.
2024ರಲ್ಲಿ ನಿವೃತ್ತಿಯಾಗುವ ನಾಲ್ವರ ಪಟ್ಟಿಯಲ್ಲಿ ಬಿಜೆಪಿ ತನ್ನ ಏಕೈಕ ಸ್ಥಾನವನ್ನಷ್ಟೇ ಉಳಿಸಿಕೊಳ್ಳಲಿದೆ. ಆದರೆ 2026ರ ವೇಳೆಗೆ ಮೇಲ್ಮನೆಯಲ್ಲಿ ಬಿಜೆಪಿ ಬಲ ಕುಗ್ಗಲಿದೆ. ರಾಜ್ಯ ಸಭೆಯಲ್ಲಿ ಪಕ್ಷ 92 ಸ್ಥಾನಗಳನ್ನು ಹೊಂದಿದ್ದು, ಇದರಿಂದ ಕಮಲದ ಸಂಸದರ ಸಂಖ್ಯೆಯಲ್ಲೇನೂ ಹೆಚ್ಚಿನ ಬದಲಾವಣೆ ಆಗುವುದಿಲ್ಲ. ಆದರೆ ರಾಜ್ಯಸಭೆಯಲ್ಲಿ ಬಹುಮತ ಹೊಂದುವ ಪಕ್ಷದ ಗುರಿಗೆ ಅಡ್ಡಗಾಲಾಗಲಿದೆ.
ಯಾರೆಲ್ಲ ನಿವೃತ್ತಿ?
ಮುಂದಿನ ವರ್ಷ ನಿವೃತ್ತರಾಗಲಿರುವ ನಾಲ್ವರು ರಾಜ್ಯಸಭಾ ಸದಸ್ಯರಲ್ಲಿ ಬಿಜೆಪಿ ಸಂಸದ ಮತ್ತು ಕೇಂದ್ರ ಸಚಿವ ರಾಜೀವ್ ಚಂದ್ರಶೇಖರ್ ಹಾಗೂ ಮೂವರು ಕಾಂಗ್ರೆಸ್ ಸಂಸದರಾದ ಎಲ್. ಹನುಮಂತಯ್ಯ, ಸೈಯದ್ ನಾಸಿರ್ ಹುಸೇನ್ ಮತ್ತು ಜಿ.ಸಿ. ಚಂದ್ರಶೇಖರ್ ಸೇರಿದ್ದಾರೆ. ಕರ್ನಾಟಕದ ತಲಾ ನಾಲ್ವರು ರಾಜ್ಯಸಭಾ ಸದಸ್ಯರು 2026 ಮತ್ತು 2028ರಲ್ಲಿಯೂ ನಿವೃತ್ತರಾಗಲಿದ್ದಾರೆ.
ಪ್ರಸ್ತುತ ಆರು ರಾಜ್ಯಸಭಾ ಸ್ಥಾನಗಳು ಖಾಲಿ ಇವೆ. ಜಮ್ಮು ಮತ್ತು ಕಾಶ್ಮೀರದಿಂದ ನಾಲ್ಕು ಹಾಗೂ ಎರಡು ನಾಮನಿರ್ದೇಶಿತ ಸ್ಥಾನಗಳು ಖಾಲಿ ಇವೆ. ಇದರಿಂದ ರಾಜ್ಯಸಭೆಯ ಒಟ್ಟು ಸದಸ್ಯಬಲ 239 ಇದೆ. ಬಿಜೆಪಿಯು 92 ಸಂಸದರನ್ನು ಹೊಂದಿದ್ದು ಅತಿದೊಡ್ಡ ಪಕ್ಷವಾಗಿದೆ. ನಂತರದ ಸ್ಥಾನದಲ್ಲಿ ಕಾಂಗ್ರೆಸ್ (31), ಟಿಎಂಸಿ (13), ಡಿಎಂಕೆ ಮತ್ತು ಆಮ್ ಆದ್ಮಿ ತಲಾ 10 ಸದಸ್ಯರನ್ನು ಹೊಂದಿವೆ. ಬಿಜು ಜನತಾ ದಳ ಮತ್ತು ವೈಎಸ್ಆರ್ ಕಾಂಗ್ರೆಸ್ ತಲಾ 9, ತೆಲಂಗಾಣ ರಾಷ್ಟ್ರ ಸಮಿತಿ (7) ಮತ್ತು ಆರ್‌ಜೆಡಿ (6) ಸದಸ್ಯರನ್ನು ಹೊಂದಿದೆ.
ಸದಸ್ಯರ ನಿವೃತ್ತಿಯಿಂದಾಗಿ 10 ಸ್ಥಾನಗಳು ಈ ವರ್ಷ ಖಾಲಿಯಾಗಲಿದ್ದು, ಮೇಲ್ಮನೆಯ ಒಟ್ಟಾರೆ ಸಂಯೋಜನೆಯಲ್ಲಿ ಯಾವುದೇ ಬದಲಾವಣೆ ಆಗುವುದಿಲ್ಲ. ಈ ವರ್ಷದ ಜುಲೈನಲ್ಲಿ ಗೋವಾದ ಒಂದು ಸ್ಥಾನ ಖಾಲಿ ಆಗಲಿದ್ದು, ಪಶ್ಚಿಮ ಬಂಗಾಳ ಮತ್ತು ಗುಜರಾತ್‌ನಲ್ಲಿ ಕ್ರಮವಾಗಿ ಆರು ಮತ್ತು ಮೂರು ಸ್ಥಾನಗಳನ್ನು ಖಾಲಿಯಾಗಲಿವೆ. ಆದರೆ 2024ರ ಮಾರ್ಚ್‌ನಲ್ಲಿ ದ್ವೈವಾರ್ಷಿಕ ಚುನಾವಣೆ ನಡೆಯಲಿದ್ದು ಈ ವೇಳೆ 56 ಸ್ಥಾನಗಳು ಖಾಲಿಯಾಗಲಿವೆ, ಈ ಸಂದರ್ಭದಲ್ಲಿ ಪಕ್ಷಗಳ ಬಲಾಬಲ ಬದಲಾಗುವ ಸಾಧ್ಯತೆ ಇದೆ.
