ಲಖನೌ: ಟೀಮ್ ಇಂಡಿಯಾದ ಪ್ರಮುಖ ಕೀ ಆಟಗಾರ ವಿರಾಟ್ ಕೊಹ್ಲಿ, ವಿಶ್ವ ಕ್ರಿಕೆಟ್ ನ ಅತ್ಯುತ್ತಮ ಚೇಸಿಂಗ್ ಮಾಸ್ಟರ್ ಎಂದು ಇಂಗ್ಲೆಂಡ್ ನ ಮಾಜಿ ನಾಯಕ ಜೋ ರೂಟ್ ಮುಕ್ತ ಕಂಠದಿಂದ ಗುಣಗಾನ ಮಾಡಿದ್ದಾರೆ.
ಈ ಹೈವೋಲ್ಟೇಜ್ ಪಂದ್ಯದ ಅಂಗವಾಗಿ ಸ್ಟಾರ್ ಸ್ಪೋರ್ಟ್ಸ್ ತನ್ನ ಅಧಿಕೃತ ಯುಟ್ಯೂಬ್ ಚಾನೆಲ್ ನಲ್ಲಿ ಅಪ್ಲೋಡ್ ಮಾಡಿರುವ ವಿಡಿಯೋದಲ್ಲಿ ಟೀಮ್ ಇಂಡಿಯಾದ ದಿಗ್ಗಜ ವಿರಾಟ್ ಕೊಹ್ಲಿ, ಇಂಗ್ಲೆಂಡ್ ನ ಮಾರ್ಕ್ ವುಡ್, ಜೋ ರೂಟ್ ಅವರು ಪಂದ್ಯದ ಕುರಿತು ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ.
“ನಾನು ಮಾರ್ಕ್ ವುಡ್ ರಂತಹ ವೇಗದ ಬೌಲರ್ ಗಳ ವಿರುದ್ಧ ಆಡಲು ಎದುರು ನೋಡುತ್ತೇನೆ. ನಾನು ಹಲವು ಬಾರಿ ಅವರ ಬೌಲಿಂಗ್ ಅನ್ನು ಎದುರಿಸಿದ್ದೇನೆ. ನನ್ನ ಪ್ರಕಾರ ಆತ ಅದ್ಭುತ ಬೌಲರ್ ಆಗಿದ್ದಾರೆ. ಅಪಾರವಾದ ಬೌಲಿಂಗ್ ಜ್ಞಾನ ಹೊಂದಿದ್ದು, ಎದುರಾಳಿ ಬ್ಯಾಟರ್ ಗಳಿಗೆ ತೊಂದರೆ ಕೊಡುವಲ್ಲಿ ನಿಸ್ಸೀಮರಾಗಿದ್ದಾರೆ. ನಿಜವಾದ ವೇಗದ ಬೌಲರ್ ಎದುರು ಪರೀಕ್ಷೆಗೆ ಒಳಪಟ್ಟು ರನ್ ಗಳಿಸಲು ಕಾತರಿಸುತ್ತಿದ್ದೇನೆ,” ಎಂದು ಟೀಮ್ ಇಂಡಿಯಾದ ಮಾಜಿ ನಾಯಕ ಹೇಳಿದ್ದಾರೆ.
ವಿರಾಟ್ ಕೊಹ್ಲಿ ಉತ್ತಮ ಚೇಸರ್: ಜೋ ರೂಟ್
ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಜೋ ರೂಟ್ ಕೂಡ ಮಾತನಾಡಿದ್ದು, ವಿರಾಟ್ ಕೊಹ್ಲಿಯ ಕ್ರಿಕೆಟ್ ಜೀವನದ ದಾಖಲೆಯನ್ನು ಮುಕ್ತ ಕಂಠದಿಂದ ಪ್ರಶಂಸಿಸಿದ್ದಾರೆ.
“ವಿರಾಟ್ ಕೊಹ್ಲಿ ಕ್ರಿಕೆಟ್ ಲೋಕದ ಸರ್ವಶ್ರೇಷ್ಠ ಚೇಸಿಂಗ್ ಮಾಸ್ಟರ್ ಆಗಿದ್ದಾರೆ ಮತ್ತು ಅವರು ನಿರ್ಮಿಸಿರುವ ದಾಖಲೆಗಳು ಅತ್ಯಮೋಘವಾಗಿದೆ” ಎಂದು ಜೋ ರೂಟ್ ಪ್ರಶಂಸಿಸಿದ್ದಾರೆ. ಜೋ ರೂಟ್ ಅವರು ಅದ್ಭುತ ಆಲ್ ರೌಂಡರ್ ಆಗಿದ್ದಾರೆ. ಅವರು ಆಡುವ ರಿವರ್ಸ್ ಲ್ಯಾಪ್ ಶಾಟ್ ನನಗೆ ತುಂಬಾ ಅಚ್ಚುಮೆಚ್ಚಿನ ಹೊಡೆತ ಆಗಿದೆ” ಎಂದು ವಿರಾಟ್ ಕೊಹ್ಲಿ, ಇಂಗ್ಲೆಂಡ್ ಮಾಜಿ ನಾಯಕನ ಪ್ರಶಂಸಿಸಿದ್ದಾರೆ.
