ದಕ್ಷಿಣ ಭಾರತದ ಸೂಪರ್ ಸ್ಟಾರ್ ಸಮಂತಾ ಅದೆಷ್ಟೋ ನಿರ್ದೇಶಕ, ನಿರ್ಮಾಪಕರ ಅದೃಷ್ಟದ ನಟಿ. ಈಕೆ ನಟಿಸಿದ ಬಹುತೇಕ ಸಿನಿಮಾಗಳು ಸೂಪರ್ ಹಿಟ್ ಆಗಿವೆ. ಸಮಂತಾ ಕಾಲ್ ಶೀಟ್ ಗಾಗಿಯೇ ಅದೆಷ್ಟೋ ನಿರ್ದೇಶಕ, ನಿರ್ಮಾಪಕರು ಕ್ಯೂನಲ್ಲಿ ನಿಂತಿದ್ದಾರೆ. ಹೀಗಿರುವಾಗ ಇತ್ತೀಚೆಗಷ್ಟೆ, ಸಿನಿಮಾ ಒಂದರಲ್ಲಿ ಪಾತ್ರ ನೀಡಿದ್ದಕ್ಕೆ ನಿರ್ದೇಶಕರೊಬ್ಬರ ಕಾಲು ಮುಟ್ಟಿ ನಮಸ್ಕರಿಸಿ ಧನ್ಯವಾದ ಹೇಳಿದ್ದಾಗಿ ಸಮಂತಾ ತಿಳಿಸಿದ್ದಾರೆ.
ಸದ್ಯ ಸಮಂತಾ, ‘ಶಾಕುಂತಲಂ’ ಹೆಸರಿನ ಸಿನಿಮಾದಲ್ಲಿ ನಟಿಸಿದ್ದು, ಕೆಲವೇ ದಿನಗಳಲ್ಲಿ ಸಿನಿಮಾ ಬಿಡುಗಡೆ ಆಗದಲಿದೆ. ಸಾಕಷ್ಟು ಅಡೆತಡೆಗಳ ಬಳಿಕ ಶಾಕುಂತಲಂ ಸಿನಿಮಾ ಥಿಯೇಟರ್ ಗೆ ಬರಲು ಸಜ್ಜಾಗಿದ್ದು ಚಿತ್ರತಂಡ ಪ್ರಚಾರ ಕಾರ್ಯದಲ್ಲಿ ತೊಡಗಿಕೊಂಡಿದೆ.
ಸಿನಿಮಾದ ಪ್ರಚಾರ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡಿರುವ ಸಮಂತಾ, ಈ ಸಿನಿಮಾದ ನಿರ್ದೇಶಕ ಗುಣಶೇಖರ್ ಅವರ ಕಾಲು ಮುಟ್ಟಿ ತಾವು ನಮಸ್ಕರಿಸಿದ ಘಟನೆ ಬಗ್ಗೆ ಹೇಳಿಕೊಂಡಿದ್ದಾರೆ.
”ನನಗೆ ಡಿಸ್ನಿ ಸಿನಿಮಾಗಳೆಂದರೆ ಬಹಳ ಇಷ್ಟ. ನನಗೆ ಬೇಜಾರಾದಾಗ, ಖುಷಿಯಾದಾಗ ಡಿಸ್ನಿಯ ಸಿನಿಮಾಗಳನ್ನು ನೋಡುತ್ತೇನೆ. ಅಲ್ಲಿ ಪ್ರಾಣಿಗಳು ಮಾತನಾಡುತ್ತವೆ, ಮುದ್ದಾದ ರಾಣಿಯರಿರುತ್ತಾರೆ, ಅದೊಂದು ಅದ್ಭುತವಾದ ಕಾಲ್ಪನಿಕ ಜಗತ್ತು. ಸದಾ ಅದೇ ಗುಂಗಿನಲ್ಲಿ ಇರುತ್ತಿದ್ದ ನಾನು ಶಕುಂತಲಂ ಸಿನಿಮಾ ಮಾಡಿ, ಮೊದಲ ಬಾರಿ ಸ್ಕ್ರೀನಿಂಗ್ ನೋಡಿದಾಗ ನಾನು ಯಾವುದರ ಬಗ್ಗೆ ಕನಸು ಕಾಣುತ್ತಿದ್ದೆನೊ ಅಂಥಹುದೇ ಪಾತ್ರದಲ್ಲಿ ನಾನು ನಟಿಸಿದ್ದೀನಿ ಎನಿಸಿತು. ಶಾಕುಂತಲಂ ಸಹ ಬಹುತೇಕ ಡಿಸ್ನಿ ರಾಣಿಯರ ರೀತಿಯೇ, ಮ್ಯಾಜಿಕಲ್ ಕಾಡಿನಲ್ಲಿ ವಾಸಿಸುತ್ತಾಳೆ. ಪ್ರಾಣಿ ಪಕ್ಷಿಗಳು ಅವಳೊಟ್ಟಿಗೆ ಮಾತನಾಡುತ್ತವೆ. ಅವಳ ಪ್ರಪಂಚದಲ್ಲಿ ಎಲ್ಲದಕ್ಕೂ ಜೀವವಿದೆ, ಎಲ್ಲದಕ್ಕೂ ಭಾವನೆ ಇದೆ. ಸಿನಿಮಾ ನೋಡಿ ನನಗೆ ನನ್ನ ಕನಸು ನನಸಾದಂತೆ ಭಾಸವಾಯಿತು. ಕೂಡಲೇ ಹೋಗಿ ನಾನು ನಿರ್ದೇಶಕ ಗುಣಶೇಖರ್ ಅವರ ಕಾಲಿಗೆ ನಮಸ್ಕರಿಸಿದೆ. ನನ್ನನ್ನು ಈ ಸಿನಿಮಾಕ್ಕೆ ಆಯ್ಕೆ ಮಾಡಿದ್ದಕ್ಕೆ ಧನ್ಯವಾದ ತಿಳಿಸಿದೆ” ಎಂದಿದ್ದಾರೆ ಸಮಂತಾ.
ಸಮಂತಾ ನಟನೆಯ ಶಾಕುಂತಲಂ ಸಿನಿಮಾವು ಕಾಳಿದಾಸನ ಶಾಕುಂತಲೆ ಕಾವ್ಯ ಆಧರಿಸಿದ್ದಾಗಿದ್ದು, ಸಮಂತಾ ರಾಣಿ ಶಾಕುಂತಲೆಯ ಪಾತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾದ ಕೆಲವು ಹಾಡುಗಳು ಈಗಾಗಲೇ ಬಿಡುಗಡೆ ಆಗಿದ್ದು, ಸಖತ್ ವೈರಲ್ ಆಗಿವೆ. ಸಿನಿಮಾದಲ್ಲಿ ದುಶ್ಯಂತನ ಪಾತ್ರದಲ್ಲಿ ದೇವ್ ಮೋಹನ್ ನಟಿಸಿದ್ದು, ಕಣ್ವ ಮಹರ್ಷಿಯ ಪಾತ್ರದಲ್ಲಿ ಸಚಿನ್ ಖೇಡೆಕರ್ ನಟಿಸಿದ್ದಾರೆ. ಸಿನಿಮಾದಲ್ಲಿ ಅಲ್ಲು ಅರ್ಜುನ್ ಪುತ್ರಿ ಅರ್ಹ ಅರ್ಜುನ್ ಇದೇ ಮೊದಲ ಬಾರಿಗೆ ಬಣ್ಣ ಹಚ್ಚಿದ್ದಾರೆ.
